Uns 130 concellos ofrecen incentivos fiscais para estimular o investimento empresarial

Un total de 131 concellos participan na iniciativa da XuntaConcellos Emprendedores tras a incorporación de Santiago de Compostela, Paderne e Cambre, Lalín e Taboadela que ofrecen ás empresas incentivos fiscais e maiores facilidades para acceder ao chan industrial.

Nun comunicado, a Xunta detalla que A Coruña conta con 33 municipios emprendedores, Lugo con 19, Ourense con 59 e Pontevedra con 20. Esta distinción –vinculada á Lei de implantación empresarial– supón apoiar a actividade industrial en Galicia con máis axilidade administrativa e bonificacións fiscais apostando “polo crecemento económico e pola dinamización do tecido produtivo“, sinala.

Para ser Concello Emprendedor, conforme explicou o Executivo autonómico, as administracións locais, unha vez que aproban nos seus respectivos plenos a modificación das ordenanzas correspondentes, teñen que adherirse ao convenio asinado entre a Xunta e a Federación Galega de Municipios e Provincias (Fegamp) para colaborar na capacitación de investimentos para Galicia.

A Consellería de Economía, Emprego e Industria destacou que dá prioridade a estes municipios en diversas liñas de axudas destinadas a impulsar a fábrica intelixente, o emprego de calidade e o emprendemento baseado na innovación e o talento. Para iso, o Goberno galego establece nestas axudas, que están a ser convocadas en réxime de concorrencia competitiva, un criterio específico.

Os Concellos Emprendedores, pola súa banda, comprométense a ofrecer ás empresas que mostren interese por situarse nas súas localidades máis incentivos fiscais, maiores facilidades para acceder ao chan empresarial e unha simplificación na tramitación administrativa.

Os maiores incentivos por parte dos concellos para favorecer a chegada de novas empresas suporán unha bonificación de ata o 95% no IBI, IAE e ICIO para aqueles proxectos que impliquen a nova implantación ou ampliación de empresas xa existentes.

Vía: http://www.galiciaconfidencial.com