A remuneración en Galicia é un 28% inferior á media dos países da UE, segundo un estudo de Adecco.
Galicia atópase, con 1.568 euros mensuais, 132 euros por baixo do salario medio do Estado, onde é de 1.700 euros. Ademais, está lonxe dos 2.017 euros que se rexistran en Madrid, que está á cabeza entre comunidades, segundo un informe de Adecco.
Con todo, é a autonomía que rexistra o maior incremento interanual do salario medio en 2019, do 3,3%. De feito, a autonomía galega foi a que conseguiu o incremento máis significativo, de +4,1% ao longo do últimos oito trimestres (o que equivale a 742 euros anuais de mellora). Seguíronlle Navarra e Estremadura (+1,9% en ambos os casos).
Se se compara co salario medio ordinario bruto dos 28 países da Unión Europea (2.172 euros mensuais en 2019), a remuneración media en Galicia (1.556 euros/mes) é un 28,4% inferior. En termos absolutos, a diferenza é de 616 euros por mes (7.392 euros anuais).
TRABALLADORES A TEMPO PARCIAL
O número de ocupados a tempo parcial baixou ata 139.800 persoas, o menor dato en dous anos. Ademais, dito número implica unha redución interanual do 12,3% (variación que, á súa vez, equivale á eliminación de 19.600 empregos de tempo parcial nos últimos doce meses).
Agora traballa a tempo parcial o 13,7% dos ocupados galegos, 0,3 puntos porcentuais menos que hai un ano. En Galicia os ocupados que tamén cursan estudos son agora o 11% do total, o que supón un descenso interanual dunha décima.
